KALIBO, Aklan—Sa atubang it nakataeana nga pagtapos it termino ni Pangueong Rodrigo Duterte, ginpasiguro it Police Regional Office ukon PRO-6 nga pagapadayunon ro hugut nga kampanya kontra sa iligal nga droga.
Sa kamatuoran suno kay P/Lt. Col. Arnel Solis, tagapaghambae it PRO-6 nga naging madinaeag-on ro andang away kontra sa illegal drugs sa bilog nga Western Visayas.
Pamatuod kara nga owa eon sanda it may na-monitor nga mga mabahoe nga grupo nga naga-operate bangud sa mas pang ginpabaskog nga mga operasyon kun sa siin mabahoe nga mga droga ro narekober partikular sa Negros Occidental ag Bacolod City.
Ginpahayag dugang nga ro maayos ag malinong nga pagpangabuhi sa rehiyon hay indikasyon it madinaeag-on nga anti-drug campaign.
Samtang, suno pa kay Solis nga padayun nga nagataas ro numero it mga barangay nga hilway eon sa iligal nga droga.
Base sa pinaka-ulihi nga datos, masobra sa 87% eon it mga barangay sa bilog nga Western Visayas ro drug cleared.
Kaibahan sigon nanda sa nasambit nga kampanya ro Philippine Drug Enforcement Agency, Department of Health, Department of the Interior and Local Government ukon DILG ag iba pang natungdan nga ahensiya it gobyerno.
Nasayuran nga naghina ro pagbaealigyaan it droga sa Iloilo City matapos nga mapatay ro lider it mga mabahoe nga drug group.
Madumduman nga sa idaeum it termino ni Duterte hay ginlunsar ro Oplan Tokhang.
