KALIBO, Aklan—Nagbilog ro Police Regional Office 6 it sangka grupo nga magatutok sa monitoring ag pagtapna sa mga grupong eakot sa ilegal nga droga ag iba pang krimen sa isla it Boracay.
Una kara, ginpangunahan ni PRO6 Director Brig. Gen. Jack Wanky ro send-off ceremony it bag-ong tukod nga Boracay Anti-Vice Unit nga ginpatigayon sa Aklan Police Provincial Office sa Camp Pastor Martelino sa banwa it Kalibo kon sa siin tuyo kara nga mapabaskog pa ro police visibility sa mga strategic areas sa isla.
Ro nasambit nga yunit hay ginakaeakipan it 22 miyembro it PNP personnel nga magausoy it mga ebidensya ag magpatigayon it maid-id nga monitoring kontra sa kriminalidad kamana man agud mapabaskog pa ro puwersa it Malay Municipal Police Station bukon eamang it sa Boracay kundi maging sa mainland Malay, Aklan.
Gin-insister ni P/Brig.Gen. Wanky nga ro nasambit nga yunit hay nakatutok sa pag-eapnaag it ilegal nga droga ag iba pang krimen kapin eon ag ginaeauman ro mabahoe nga numero it mga turista nga magapataliwan it Semana Santa sa Boracay.
Samtang, nakatutok mat-a ro lokal nga pulisya sa seguridad sa pinaagi it ginpabaskog nga pagpatrolya partikular sa mga matawong lugar kapin eon ag libo-libong mga turista ro nagasueod sa Boracay kada adlaw.
Dugang pa ni P/Brig.Gen. Wanky nga tuyo it proactive ag strategic response hay agud masiguro ro kaeowasan it mga turista ag mapabilin ro Boracay bilang premier tourist destination.
Madumduman nga naputos it kontrobersiya ko kan-o eamang ro Boracay kasunod sa makangieidlis nga pagpatay sa 23-anyos nga Slovak tourist nga si Michaela Mickova nga nasapwan eon lang sa abandonadong chapel sa bukon it manami nga sitwasyon.
