KALIBO, Aklan—Ginre-launch ni Philippine National Police (PNP) Deputy Chief for Operations, P/Lt. Gen. Camilo Cascolan ro tokhang kontra armas luthang matapos ro anang pagbisita sa Police Regional Office (PRO)-Western Visayas sa Camp Martin Delgado, Iloilo City.
Suno kay P/Lt. Col. Joem Malong, tagapaghambae it PRO-6 nga gindayaw ni Cascolan ro natipon nga masobra sa 10,000 nga mga armas sa bilog nga rehiyon umpisa Hulyo it nagtaliwan nga dag-on, kun sa siin, pila kara hay nadakpan ag ro iba hay gin-deposito sa nagkaeain-eain nga police stations sa bilog nga Western Visayas.
Umpisa man suno kana it Hulyo it makaron nga dag-on hasta Nobyembre hay masobra sa 500 eon ro andang natipon nga armas eakip ro mga ginserbihan it search warrant.
Mag-eowas kara ro Region 6 eamang ro nakaangkon it makarondaya nga inisyatibo.
Ginpahayag ni Malong nga target kara ro mga loose firearms ukon mga armas nga owa it lisensiya ag indibidwal nga owa it permits para sa ginahuptan nga armas.
Pinaagi sigon sa re-launching hay uman nga matutukan it mga police ro loose firearms ag malikawan ro mga shooting incident.
Ginsuhestiyon man sigon ni Cascolan nga magpatigayon it re-launching bukon eamang it kada dag-on kundi kada buean.
