KALIBO, Aklan–Nag-abot eon sa 145 ro nairecord nga nag-eabag sa gun ban sa pag-umpisa it election period ko Enero 6 hasta ko Abril 2, 2022.
Raya ro ginpahayag ni Police Regional Office ukon PRO 6 spokesman Lt.Col. Arnel Solis.
Nakakumpiska sigon sanda it 27 nga nagkaeain-eain nga baril ag 69 nga bladed weapons.
Angot kara, uman nga nagpaandam si Solis sa mga gun owners nga owa it exemption halin sa Comelec nga likawan ro pagdaea it baril ag iba pang mataeum nga hinganiban kon maggguwa sa mga panimaeay agud nga makalikaw sa pagka-aresto.
Sa nasambit nga numero it mga violators, 17 ro naghalin sa Aklan, pito ro halin sa Antique, lima ro halin sa Guimaras, 23 ro halin sa probinsiya it Iloilo, 57 ro halin sa Negros Occidental, 16 ro sa Iloilo City ag 11 ro taga Bacolod City.
Pila sa mga raya hay nadakpan sa comelec checkpoint samtang ro iba hay sa pagresponde it mga kapulisan sa mga insidente it kinagamo.
Haeos tanan sigon hay napasakaan eon it kaso.
Ro gun ban hay magiging epektibo hasta sa katapusan it election period sa June 8, 2022.
Sa pihak nga parte, ginkumpirma it PRO-6 nga may pilang nga kandidato eon nga nag request it police security detail, apang pila sa mga raya hay nakapending pa sa national level para sa approval.
Sambilog sigon sa mga baeasihan kara hay kon may paeag sa kabuhi it sangka kandidato.
Samtang, ginpahayag ni Solis nga handum it PNP nga makaangkon it malinong ag maayos nga eleksyon sa maabot nga Mayo 9.
