KALIBO, Aklan–Nakalista ro Police Regional Office (PRO)-6 it kapin sa 227 nga mga gun ban violator sa bilog nga Western Visayas.
Suno kay Police Lieutenant Colonel Arnel Solis, tagapaghambae it PRO-6 nga ginakaeakipan raya it 86 nga violator halin sa Negros Occidental, 41 sa probinsya it Iloilo, 28 sa Aklan, 21 sa Antique, 12 sa Capiz, waeo sa Guimaras, 22 sa Iloilo city ag 19 sa Bacolod City.
Nakakumpiska man ro ahensya it 129 nga mga nagkaeain-eain nga kalibre it firearms ag 114 nga deadly weapons.
Madumduman nga base sa ginpagguwa nga Comelec Resolution 10728, hugut nga ginabawae ro pagdaea it baril ukon anumang hinangiban sa guwa it panimaeay umpisa Enero 9 hasta Hunyo 8, 2022.
Ginpahayag dugang nga pagapasugtan eamang ro pagdaea it baril pagkatapos it nasambit nga petsa basta nga may una rayang lisensya ag permit to carry outside of residence.
