KALIBO, Aklan—Nakalista ro Police Regional Office ukon PRO-6 it 4,447 nga mga indibidwal nga naaresto nga nagapatigayon it illegal gambling umpisa Enero hasta Oktubre 12 it makaron nga dag-on.
Raya hay mas mataas kumpara sa 4,182 nga nailista sa kaparehong period ko nagtaliwan nga dag-on.
Raya ro ginpahayag ni PMaj. Mary Grace Socorro Didulo Borio, OIC Regional Public Information Officer.
Suno kana nga nakapatigayon man it 1,350 nga illegal gambling operations ro tanan nga mga municipal police stations sa rehiyon nga nagresulta sa pagkakumpiska it masobra sa 1.3 million pesos nga pusta nga kwarta.
Ginpahayag dugang nga naaresto ro mga suspek bangud sa paghampang it “tong-its”, “bookies”, cara y cruz, pusoy, mahjong ag iba pa.
Ro anuman nga hampang nga may pusta suno kana hay makabig nga iligal.
Resulta suno kana raya it mandu it national headquarters sa tanan nga mga hepe it kapulisan nga mas pang pabaskugon ro operasyon kontra sa illegal gambling.
Sa pihak nga parte, ginpaathag ni Maj. Borio nga illegal ro hampang sa mga peryahan kon owa raya naeakip sa gin-isyu nga permit it mga ginapasugtan nga hampang kamana man kon may pusta nga eakot.
Kinahangean man sigon nga mag agi sa proseso antes nga ikasa ro operasyon kontra sa management it peryahan.
