KALIBO, AKLAN— Gin pasiguro ni National Food Authority (NFA) Aklan Manager Josephine Venus Castillo nga bastante ro supply it bugas sa probinsiya it Aklan.
Owa sigon it problema sa inventory it bugas bangud makabig nga sa “surpass” level raya.
Gin hayag kara nga sa bug-os nga Region VI hay bastante ro supply sa mga bodega it NFA apang, nagpamalibad nga magkomento sa kun ano ro status sa bug-os nga nasyun.
Samtang, gin klaro man kara nga ro function eamang it NFA hay ro pagsuporta sa presyuhan ag indi sigon makontrol kara ro mga local farmers engkaso nga magbaligya it andang paeay sa mga traders nga nagatanyag it mataas nga presyo.
Ro apela eamang ni Castillo hay i-share man kanda it mangunguma ro andang paeay nga may mabakae man ro NFA ag indi tanan ibaligya sa mga traders.
Dapat sigon panumdumon nga sa tiempo nga gina barat it mga traders ro paeay, ro andang taeatapan kara ro nagabulig.
Nasayuran nga sa makaron hay may unang 14,129 nga sako it bugas ro naka-inventory nga stock it NFA-Aklan ag makabig nga masyadong mataas sa household inventory hay masyadong mataas bangud sa owa nakasueod ro probinsiya sa gina kabig nga critical level.
Gin hayag man ni Castillo nga engkasong kueangon it supply engkaso nga may mag eontad nga kalamidad, haum sigon raya nga matugunan it depot warehouse it NFA sa Capiz nga sa “surpass” level man rong supply it bugas.
