KALIBO, Aklan — Ginkalipay it gobyerno probinsiyal ro pagkapasa sa Seal of Good Local Governance (SGLG) kaibahan ro ap-at nga munisipalidad makaron nga dag-on it Department of the Interior and Local Government (DILG).
Suno kay Engr. Roger Esto, coordinator it Provincial Planning and Development Office nga raya hay base sa ginpatigayon nga assessment , kun sa siin, naeakip ro Aklan ag ro ap-at nga banwa nga ginaeakipan it Banga, Buruanga, Ibajay ag New Washington sa mga passers.
Nasayuran nga ro Aklan eamang ro nakapasa sa bilog nga Western Visayas makaron nga dag-on.
Mag-eowas kara, raya eon ro ika-limang sunod-sunod nga dag-on nga pagkilaea sa probinsiya it Aklan umpisa 2014 hasta 2019.
Gindugang pa ni Engr. Esto nga nagsangkiri makaron ro mga probinsiya ag banwa sa bilog nga nasyon nga nakabaton it SGLG bangud sa maid-id nga evaluation nga ginbase sa pitong core assessment areas kapareho it financial administration, disaster preparedness, social protection, peace and order, business-friendliness and competitiveness, environmental management, ag tourism, culture and arts.
Ro mga SGLG passers hay may cash prize nga pagagastuson sa mga napiling proyekto, pwedeng maka-avail ag maka-access sa Performance Challenge Fund (PCF), pag-facilitate it loan approval pinaagi sa gin-isyu nga Good Financial Housekeeping Certification ag iba pa.
Ginpahayag pa ni Engr. Esto nga ro SGLG hay owa eamang nagaduso sa pag-angkon it transparency ag accountability sa operasyon it local government units kundi nga hangkat man sa LGUs nga mapadayun ro good governance practices samtang nagatau it mayad nga serbisyo publiko.
Ro mga SGLG passers makaron nga dag-on hay pagakilaeahon sa conferment ceremony nga pagahiwaton sa buean it Nobyembre.
