KALIBO, Aklan— Sa pihak it pagdagsa it mga beach goers ko nagtaliwan nga long weekend sa mga baybayon sa bilog nga probinsiya it Aklan, owa it nailistang drowing incident ukon insidente it pagkaeumos.
Raya ro malipayon nga ginbalita ni P/Capt. Aubrey Ayon, hepe it Tangalan Municipal Police Station ag Public Information Officer it Aklan Police Provincial Office ukon APPO.
Suno kana nga pagkatapos nga ginduea ro mga restrictions tuga it Covid-19 pandemic, libu-libong mga beach goers ro nailista sa mga baybayon it probinsiya partikular sa Isla it Boracay.
Kaabuan nga nagdagsa ro mga tawo ko adlaw it Sabado ag Domingo.
Apang sa pihak kara, sa mayad nga suwerte hay owa nakaangkon it drowning incident sa mga beaches ag mga swimming pools.
Samtang, gindugang pa ni Capt. Ayon nga sa makaron hay nagapadayun ro andang pagbantay sa mga baybayon, mga daeanon ag mga Tourist Site nga padayun nga ginadagsa it mga tawo kadungan sa paglunsar it PNP it Oplan Ligtas Sumvac ukon “Summer Vacation 2023” Campaign Nationwide agud nga masiguro ro eowas nga pagbiyahe it mga motorista ag commuters nga gin-umpisahan ko Lenten Season hasta sa pagtapos it summer months.
