KALIBO, Aklan—Ginpaidaeom sa state of calamity ro probinsya it Aklan bangud sa alarming nga pagkalhit it African Swine Fever ukon ASF virus.
Raya hay kasunod sa urgent request ni Aklan governor Joen Miraflores bangud nga nagkalhit eon sa pitong kabanwahanan ro virus nga ginakaeakipan it banwa it Balete, Tangalan, Makato, Numancia, Kalibo, Batan, ag New Washington.
Ginhimo ro deklarasyon sa bisa it sangka resolution nga gin-aprubahan it 19th Sangguniang Panlalawigan it Aklan nga ginpangunahan ni Vice Governor Atty. Reynaldo Quimpo sa ginpatigayon nga special session.
Una kara, ginkumpirma ni Dra. Mabel Señel it Office of the Provincial Veterinarian ukon OPVET Aklan nga kabilugang 426 ka mga baboy ro andang ginsunog bangud nga infected raya it virus ag ro iba hay na-expose.
Sa nasambit nga numero, 288 ro naghalin sa banwa it Balete ag 138 ro halin sa munisipalidad it Tangalan.
Angot kara, agud nga inde eon magkalhit ro virus sa iba pang kabanwahanan hay gilayon nga ginpatuman ro total banning sa pagpasueod it mga live weight nga baboy ukon anu man produktong karne it baboy maging processed ukon frozen products.
Inde kaguwa sa mga natungdan nga banwa ro baboy ag ro andang produkto hay sanda eang man ro pwede nga magkonsumo.
Bangud kara, haeos kaeabanan sa lokal nga gobyerno hay nagpaguwa it mandato nga hugton ro striktong implementasyon it border control checkpoint.
