KALIBO,Aklan– Haeos tanan nga kabanwahanan sa bilog nga probinsya it Aklan hay may kaso eon it dengue sa unang an-om nga buean it presenteng dag-on.
Suno kay Donna Rico, health program officer for vaccine preventible disease it Provincial Health Office nga halin ko January 1 hasta ko June 10 hay nakalista sanda it kabilugang 288 nga kaso it dengue.
Kaeabanan sa mga tinamaan it virus hay ro mga senior citizens ag mga onga.
Sa nasambit nga numero, ro banwa it Altavas ag Banga hay nakalista it tig-siyam nga kaso; Balete nga may 14; New Washington nga may 24; Tangalan, Malinao, Lezo ag Libacao nga may tig-pito nga kaso; Numancia nga may 10; Makato nakalista it lima; Malay nga may waeo; Nabas nga may 41; Kalibo nga may 42 nga kaso; Madalag nga may tatlo ag ro pinakamataas hay ro munisipalidad it Ibajay nga nakarekord it 82 nga kaso.
Angot kara, kapin sa 4 porsyento ro gintaas it nasambit nga numero nga may daywang namatay kon ikumpara ko nagtaliwan nga dag-on sa kaparehong period nga nakalista eamang it 276 nga kaso.
Sa makaron suno kay Rico hay uwa pa it banwa nga nagdeklara nga may outbreak it dengue virus sa andang lugar.
Ginpadumdom man kara ro tanan nga ipabilin nga malimpyo ro guwa ag sueod it panimaeay agud nga uwa it pamugaran ro eamok nga may daeang dengue virus.
