Kalibo Aklan —–Umpisa sa Mayo 1 hay iga-downgrade eon it Aklan ro mga tikang kontra coronavirus disease (COVID-19) sa General Community Quarantine.
Suno kay Governor Florencio Miraflores nga pagasundon nanda ro naging rekomendasyon it National Inter-Agency Task Force Against COVID-19 matapos nga ma-assess ro Aklan sa idaeum it “moderate risk.”
Ginklaru it gobernador nga ro mga naga-edad it 60 anyos pataas hay bawae sa gihapon nga makaguwa kamana man ro mga naga-edad it 20 anyos panaba.
Raya hay nagakahueugan suno kana nga ro mga 21 anyos hasta 59 anyos ro pwede nga magguwa sa andang mga panimaeay agud nga magbakae it mga kinahangeanon maskin nga owa it quarantine pass.
Ginpahayag dugang nga maskin nga naka-GCQ eon hay makaangkon sa gihapon it mga limitasyon.
Ginpahayag pa ni Miraflores nga magapaguwa imaw it Executive Order para sa implementasyon it GCQ.
Magapatigayon man it pueong ro gobernador sa mga Aklan Mayors angot sa pag-downgrade sa Aklan ag ro igaplastar nga mga polisiya sa idaeum it GCQ partikular ro pagbo-oe sa mga Barangay Checkpoints .
Apang ro border checkpoints pasueod ag paguwa sa Aklan hay magapadayun.
Pila sa mga establisimento komersiyal hay pagabuksan , apang limitado ro operasyon.
Sa mga pampublikong saeakyan , limitado eamang sa daywa ro pasahero it mga tricycle ag ro mga bus ag jeep hay 50% it seating capacity ro pagapasugtan .
Hugut man gihapon nga igapatuman ro “no backrider policy” sa mga motorsiklo.
Ro operasyon suno kana it mga paeuparan sa Aklan hay limitado eamang sa cargo flights.
Gindugang pa nga padayun nga magalibot ro kapulisan agud nga bantayan ro hueag it mga tawo.
Bawae man gihapon ro pagtipon-tipon it mga tawo ag ro selebrasyon it mga kapiestahan.
