KALIBO, Aklan—Kaibahan ro Aklan sa mga probinsiya sa Western Visayas nga nag-bid agud nga mag-host it Palarong Pambansa 2024.
Suno kay Dr. Feliciano Buenafe, Jr. Schools Division Superintendent it Department of Education ukon DepEd-Aklan nga nagpadaea eon it intensyon si Aklan Governor Joen Miraflores para sa pag-bid it hosting.
Mag-eowas sa Aklan hay nagpaabot man sigon it interes ro iba pang probinsiya sa Western Visayas sa pag-host it kompetisyon.
Ro 2023 Palarong Pambansa sa maabot nga Hulyo 29 hasta Agosto 5 hay pagahiwaton sa Marikina City may tatlong dag-on ro nagtaliwan umpisa nga ginkansela ro event bangud sa pandemya.
Sa pihak nga parte, ginpaathag ni Dr. Buenafe nga may bag-ong patakaran nga ginpakilaea ro DepEd para sa Palarong Pambansa nga “pre-national qualifying meet” agud nga mapahagan-hagan ro numero it delegasyon, mapatag-od ro adlaw it event, malikawan nga madisturbo ro pagpatigayon it mga klase ag mapanaba ro gastos.
Raya hay para eamang sigon sa team sports kapareho it baseball, basketball, futsal, sepak takraw, football, ag volleyball.
Ginpahayag dugang nga ro ap-at nga rehiyon sa Visayas hay nakataeanang maga compete sa Cebu para sa team games kun sa siin ro daywang nagapangunang teams ro maga-abanse sa Palarong Pambansa event.
