KALIBO, Aklan—Sa pihak it mga nailistang kaso it local transmissions it coronavirus disease ukon COVID-19 sa nasyon, nagapabilin nga COVID free ro probinsiya it Aklan.
Raya ro ginkumpirma ni Dr. Cornelio Cuatchon it Provincial Health Office ukon PHO-Aklan.
Suno kana nga haeos sang buean eon kita nga owa it may nailistang kaso it persons under investigation ukon PUI, apang may una nga mga persons under monitoring ukon PUM nga nailista sa Kalibo, Numancia ag Madalag.
Raya hay base sa datus nga andang nabo-oe sa mga Barangay Health Emergency Response Team ag municipal health office.
Suno kay Dr. Cuatchon nga ro mga pasaherong naghalin sa mga nasyon nga may nailistang kumpirmadong kaso it virus hay obligadong magpaidaeum sa “14-day mandatory ukon home quarantine agud nga ma-monitor kon may andang ubo, eagnat ag sip-on.
Gintalakay sigon nanda sa meeting kahapon kon paalin nga hugut nga mapatuman ro home quarantine.
Dapat sigon nga indi anay sanda magpanaw sa sueod it 14 diyas, nagapatigayon it reverse isolation, nakasuksok it face mask, may distansiya sa miyembro it pamilya nga mga sang metro, may separado nga gamit eabi eon ro eating utensils ag may close coordination sa mga taga-Barangay Health Emergency Response Team.
Sa idaeum sigon it RA 11332 ukon mandatory reporting hay posibleng mapinahan ukon makulong ro mga naga-eabag sa home quarantine ag iba pang patakaran it gobyerno.
Kon magapakamatig-a ro sangka indibidwal ukon OFW hay pagahinyuon nanda ro bulig it kapulisan agud nga raya hay maaresto.
Ginrekomenda sigon nana sa meeting nga ro tanan nga mga naghalin sa ibang nasyon, may kaso it COVID 19 ukon owa hay ginapaidaeum sa home quarantine.
Sa pihak nga parte, owa pa sigon it klaru nga ebidensiya nga kusa nga nagakamatay ro virus it COVID 19 sa mainit nga lugar.
Ginlaygay pa kara ro pirmeng maghugas it alima, i-practice ro proper cough etiquette, indi magpila kon siin siin, healthy lifestyle ag iba pa.
