KALIBO, Aklan—Padayun nga ginakontrol it Office of the Provincial Veterenarian ukon OPVET-Aklan ro paghueag it mga baboy ag meat products sa bilog nga probinsya agud nga mapabilin ro mga lokalidad ag protektahan ro hog industries kontra sa paeag it African Swine Fever (ASF).
Suno kay Dr. Joseph Lachica it OPVET-Aklan nga nagapabilin nga naka-focus sa pagkontrol sa ASF ro probinsya base sa Executive Order No. 046 ag 060 nga gin-isyu ni Aklan Governor Florencio Miraflores nga nagadeklara it temporaryong pagbawae sa mga baboy ag mga produkto kara nga halin sa Luzon ag iba pang ASF infected areas sa nasyon.
Ro mga meat products sigon nga ginabyahe sa ibang banwa sa sueod it probinsya hay kinahang-ean nga magpakita it transport permit ag ro mga karne it baboy nga halin sa guwa it Aklan hay kinahang-ean nga magpakita it shipping permit.
Raya hay para malikawan ro pagkalhit it nasambit nga virus.
Ginatugyan man sigon nanda sa lokal nga gobyerno ro responsibilidad sa pagpatuman it “No permit, No Slaughter Policy” sa mga baboy nga ginadaea sa slaughter house.
Kaangot kara, nag-apela man imaw sa mga naga-online selling ag barter nga sikyaron it mayad ro dokumento ukon papeles it andang ka-transaksyon ag kun nag-agi sa tamang proseso ro ginabaligya ag ginabakae nga produkto.
Samtang, nagapabilin man suno kana ro andang hugut nga pagbantay sa tanan nga borders, sea ports ag airport it probinsya agud masiguro nga owa it makaeusot nga infected meat products.
Sa makarun, nagapabilin nga ASF free ro Aklan ag bilog nga Western Visayas.
