KALIBO, Aklan—Nagapabilin nga euwas sa paeag it African Swine Fever (ASF) ro probinsya it Aklan ag bilog nga Western Visayas base sa pinakaulihing ASF Zoning Map it Department of Agriculture (DA) Aklan.
Suno kay Dr. Joseph Lachica it Office of the Provincial Veterenarian ukon OPVET-Aklan, padayun nga ginakontrol it probinsya ro paghueag it mga baboy ag meat products agud mapabilin ro mga lokalidad ag protektahan ro hog industries nga euwas sa nasambitang virus.
Ginpahayag dugang nga nagapabilin nga naka-focus sa pagkontrol sa ASF ro probinsya base sa Executive Order No. 046 ag 060 nga gin-isyu ni Aklan Governor Florencio Miraflores nga nagadeklara it temporaryong pagbawae sa mga baboy ag mga produkto kara nga halin sa Luzon ag apektadong mga lugar it ASF sa nasyon.
Bangud sa mga ginapatuman nga lockdown ag pagsarado it mga paeuparan sa probinsya it Aklan tuga it pandemic nga COVID-19, nabawasan ro peligro it pagsueod it infected meat products.
