KALIBO, Aklan—Ginpasiguro it Office of the Provincial Veterenarian (OPVET) Aklan nga nagapabilin nga euwas sa paeag it African Swine Fever ukon ASF ro bilog nga probinsya.
Suno kay Dr. Joseph Lachica, Veterinarian II it OPVET Aklan nga hugut gihapon ro andang kampanya agud nga indi masudlan it mga kontaminadong karne ro probinsya eabi eon makaron nga holiday season.
Ro ginapasugtan eamang sigon nandang makasueod nga produktong may sangkap it karneng baboy hay halin eamang sa Visayas.
Raya sigon hay bilang pagdahan matapos nga makalista it ASF outbreak ro Luzon ag pilang parte it Mindanao.
Nagpatpat man sigon sanda it pilang mga documentary requirement sa mga ginabyaheng karne sa guwa it probinsya kapareho it certificate of disinfection ag veterinary health certificate nga dapat owa it outbreak sa ginahalinan nga farm 21 diyas antes ro adlaw it pagbyahe.
Samtang, ginapahayag nga base sa ginpatigayun nga monitoring it OPVET-Aklan sa pilang tindahan hay naka-monitor sigon sanda it paghueag sa presyo it mga karne makaron nga ulihing quarter it dag-on.
Ro paghueag sigon sa presyo it mga karne hay depende sa demand kara sa merkado.
Kaangot kara, nagapabilin man sigon nga bastante ro supply it baboy sa Aklan maskin nga naga-supply ro probinsya sa Luzon.
