KALIBO, Aklan—Nagapabilin nga negatibo sa Bird Flu ag African Swine Fever ukon ASF virus ro bilog nga probinsya it Aklan.
Raya ro ginkumpirma ni Dr. Mabel Seniel, provincial veterinarian it Office of the Provincial Veterinary ukon OPVET Aklan sa interview it Bombo Radyo Kalibo.
Angot kara, ginpaeawig pa ro implementasyon it executive order ni Aklan governor Joen Miraflores angot sa pagstrikto sa pagpasueod it mga balot ag itlog maghalin sa probinsya it Batangas kasunod it nailista nga kaso it bird flu sa nasambit nga lugar.
Apang, ginapasugtan ro pagsueod it iba pang frozen ag proccessed poultry products maghalin sa rehiyon it Luzon nga negatibo sa nasambit nga virus.
Ginpahayag dugang nga natapos eon man ro ginpatigayon nga pag banned sa poultry products maghalin sa probinsya it Capiz bangud nga nag negatibo sanda sa virus.
Sa makaron suno kay Dr. Seniel hay bastante ro supply it livestock ag poultry products sa probinsya it Aklan kamana man sa supply it baboy eabi eon makaron nga sunod-sunod ro mga selebrasyon it Ati-Atihan festival sa mga nagkaeain-eain nga banwa sa probinsya.
Ginpasiguro man kara nga ginahimo nanda ro tanan nga inde masudlan it maskin anong peste sa manok, baboy ag sa maskin anong sapat ro Aklan para inde maapektuhan ro mga nagaalaga kara eabi eon ro mga negosyante.
