KALIBO, Aklan—Nakalista it 15 nga panibag-ong kaso it coronavirus disease ukon COVID-19 sa probinsya it Aklan.
Dugang pa kara ro daywang kaso it mga namatay bangud sa nasambitan nga sakit.
Suno kay Dr. Cornelio Cuatchon Jr. it Provincial Health Office ukon PHO-Aklan nga makarun hay may una eun nga 74 nga kabilugang kaso it COVID-19 sa probinsya kung sa siin 35 kara ro active cases ag ro 35 nga iba pa hay naka-recover eun.
Raya man ro nailistang pinakamataas nga kaso sa sueod it sang adlaw matapos nga naka-record eamang it 14 nga kaso it sakit ko Setyembre 14.
Makarun hay may una eun nga 29 healthcare workers sa Dr. Rafael S. Tumbokon Memorial Hospital (DRSTMH), Covid-19 referral facility sa Kalibo, ag maghalin sa private hospitals ro natapnan it coronavirus.
Sa mga presenteng kaso, 20 ka mga hospital staff hay maghalin sa banwa it Kalibo, tatlo sa Numancia, daywa sa Malinao, samtang tig sambilog man sa Lezo, Banga, Ibajay ag Makato.
Ro sangka 10 anyos nga eaeaki maghalin sa banwa it Makato ag ginakabig nga high risk contact it sangka healthcare worker ro pinakabata nga pasyente it COVID-19 sa probinsya.
Samtang, ro daywang panibag-o nga namatay hay ginakaeakipan it sangka 53 anyos nga babaye ag 57 anyos nga eaeaki ag parehong residente it banwang Kalibo.
Ro andang swab test results hay nagguwa nga positibo sa virus.
May kaangtanan kara, ginakabig man ni Dr. Cuatchon ro Aklan provincial hospital bilang epicenter it pandemya.
Nasayuran nga ro sangka 22 anyos nga laboratory encoder it provincial hospital ro unang kumpirmadong kaso it local transmission case sa probinsya.
Bangud kara, gina-engganyo sa gihapon ni Dr. Cuatchon ro publiko nga maging vigilante, perming magsuksok it face mask ag face shield, ag mag-oberba it physical distancing ag proper hygiene.
