KALIBO, Aklan—Nakalista it tatlong panibag-o nga kaso it Coronavirus disease ukon COVID-19 ro probinsya it Aklan.
Raya tanan hay mga Locally stranded Individual (LSI’s).
Daywa sa mga pasyente hay maghalin sa banwa it Libacao ag sambilog sa Kalibo.
Si LSI # 3, 59-anyos nga babaye ag si LSI # 4, 55-anyos nga eaeaki hay parehong residente it Libacao ag magkaibahan nga nag-uli sa probinsya ko Hulyo 21 maghalin sa Tondo, Manila.
Samtang si LSI # 5 nga maghalin sa banwa it Kalibo hay sangka 25-anyos nga babae maghalin sa Pasay City ag nag-abot sa Aklan ko Hulyo 22, 2020.
Nagguwa ro andang test result maghalin sa Western Visayas Medical Center kahapon nga adlaw July 30 ag sanda hay positibo sa nasambitang sakit.
Ro daywang pasyente maghalin sa Libacao hay presenteng naka-isolate sa Ligtas COVID Center apang si patient #5 nga dating naka home quarantine hay ginsaylo sa facility quarantine.
Ginpahayag ni Dr. Cornellio Cuatchon Jr. it Provincial Health Office (PHO-Aklan) nga Asymptomatic ro tanan nga mga pasyente ag maid-id nga gina-monitor antes igapaidaeum sa repeat test sa masunod nga 14 diyas.
Sa kabilugan may una eun nga 15 kumpirmadong kaso it COVID -19 ro probinsya kung sa siin ginakaeakipan it 4 nga repatriated oversease filipino workers (ROF’s), 5 LSI’s, ag 6 nga may history of travel sa Metro Manila.
Sa nasambitang numero, ap-at ro nailistang active cases tuga it makamaeatay nga sakit.
