Nagapangatubang makaron sa panibag-ong problema ro probinsya it Aklan matapos nga nakalista it kauna-unahang kaso it African Swine Fever nga nakit-an sa mga baboy nga nagmasakit ag namatay sa Brgy. Arcanghel Sur, Balete.
Sa sangka press conference, ginkumpirma ni Aklan governor Jose Enrique Miraflores nga positibo sa ginakahadlukan ag ginakabaeak-an nga virus ro blood sample nga nabuoe sa mga native nga baboy sa nasambit nga lugar.
Angot kara, insigidang nagpaguwa it executive order No. 06 series of 2023 si Balete mayor Dexter Calizo kon sa siin ginabawaean ro temporaryong pagpaguwa it live weight nga baboy ukon anumang pork products maghalin sa nasambit nga lugar.
Sa pihak kara, positibo ag confident si governor Miraflores nga masarangan nga masuk-ean ro panibag-ong hangkat bangud nga posibleng maapektuhan it husto kara ro mga hog raisers ag ro mga negosyante it baboy.
Sa makaron suno sa gobernador hay may quarantine border checkpoint nga ginbutang sa mga entry ag exit point it lugar agud nga ma-contain ag inde eon magkalhit sa mga kaeapit nga barangay ag banwa ro virus.
