Kalibo Aklan ——-Nakalista it limang bag-ong kaso it Coronavirus disease 2019 (COVID-19) sa probinsiya it Aklan .
Suno kay Dr. Cornelio Cuatchon Jr., it Provincial Health Office (PHO-Aklan) nga ro lima hay puro Locally Stranded Individuals (LSI’s) nga nag-avail it balik-probinsiya program.
Raya hay ginaeakipan it daywang babaye halin sa Banga nga naga edad it 46 ag 34 anyos nga naghalin sa Valenzuela City , sambilog ro taga Ibajay nga naga edad it 28 anyos halin sa Manila kamana man ro 40 anyos nga taga banwa it Numancia nga naghalin sa Malabon City ag ro 26 anyos nga taga Kalibo nga may travel history sa Germany ag Manila.
Bangud kara, naga-abot eon sa 22 ro kumpirmadong kaso it COVID-19 sa probinsiya.
Ginpahayag dugang nga owa ro mga raya it sintomas ag presenteng naka-facility quarantine sa Aklan Training Center sa Barangay Old Buswang, Kalibo para sa hugut nga monitoring.
Gin-abisuhan eon man sigon kara ro andang natungdan nga Local Government Units (LGU’s).
Ginpahayag pa ni Dr. Cuatchon nga ro ap-at hay ginpaidaeum eamang sa rapid anti body test sa Manila, apang pag-abot sa Aklan matapos ro profiling ag assessment hay gin boe-an man sanda it swab test , kun sa siin hay nagpositibo ro mga raya.
Samtang ro taga Kalibo hay ginboe-an it swab test sa Makati Medical Center.
Insigida sanda nga nagpatigayon it contact tracing ag ro mga posibleng nakasalamuha it mga raya hay ginboe-an it swab specimen ag natigayon eon nga mapadaea sa Western Visayas Medical Center sa Iloilo City .
Ginpamilit pa it PHO nga ro Aklan hay owa pa it nailistang local transmission it coronavirus.
Nakadepende man suno kana sa National Inter-agency Task Force kon pagapasugtan pa nga maka-uli ro mga LSI’s ag mga Returning Overseas Filipino Workers matapos nga ginpaidaeum sa Modified Enhanced Community Quarantine (MECQ) ro NCR, Bulacan, Cavite, Laguna ag Rizal.
