KALIBO, Aklan—Padayun nga nakakalista ro probinsiya it Aklan it pinakamaabu nga numero it COVID-19 cases kada adlaw sa bilog nga Western Visayas.
Suno kay dr Cornelio ‘Bong’ Cuatchon Jr. it Provincial Health Office ukon PHO-Aklan nga base sa case bulletin it Department of Health ukon DOH region 6, nakalista ro probinsiya it record-breaking nga 170 nga bag-ong kaso makaron nga adlaw it Martes sa sueod eamang it sang adlaw.
Sa kabilugan nga 375 nga ginpaidaeum sa RT-PCR tests, 170 ro nagpositibo ukon may positivity rate nga 45.3%.
Suno kana nga nagatinaas man makaron ro average daily attack rate (ADAR), kun sa siin naga-average it masobra sa 100 cases per day ro Aklan umpisa makaron nga buean it Hulyo.
Ginpahayag ni Dr. Cuatchon nga buot hambaeon kara nga nagapabilin nga una sa “high risk” ro probinsiya para sa COVID-19.
Sa pihak nga parte, matapos nga makalista it tatlong beta variant it covid 19 ag daywang P3 variant hay uman sanda nga nagpadaea it swab specimens sa Philippine genome center agud nga ipaidaeum sa genome sequencing.
Nagapadayon suno kana ro monitoring it natungdan nga mga LGUs ag rural health unit sa mga close contact it mga nagpositibo sa mga variant of concern nga natumod sa probinsiya.
Ginlaygay man nana sa mga pumueuyu nga engkaso nga makabatyag it sintomas hay insigidang magpa-check-up ag indi mag-self-medicate.
Importante man sigon makaron nga tiempo ro pagsunod sa minimum health standards agud nga malikawan ro transmission it deadly virus.
Sa makaron hay naga-average sa 10 nga admission kada adlaw sa covid ward it Aklan provincial hospital.
Sa pihak nga parte, umpisa Hulyo 25, ro banwa it Madalag ag Numancia hay gintumod nga critical area sa covid 19 samtang ro mga banwa it Lezo, Banga, Ibajay, Kalibo, Malinao , Libacao, Malay ag Makato hay makabig nga mga high risk area.
