KALIBO, Aklan—Nagapati si Governor Florencio Miraflores nga pwede eon nga ipaidaeum sa Alert Level 1 ro probinsiya it Aklan, ro pinakahaeuga sa mga quarantine restrictions sa masunod nga buean.
Suno kana nga ginpaabot eon nana ro anang apela sa National Inter-Agency Task Force for the Management of Emerging Infectious Diseases.
Magapabilin ro Aklan sa idaeum it Alert Level 2 hasta sa Nobyembre 30.
Sa pihak kara, ginpamilit ni governor Miraflores, agud nga maging kwalipikado sa pagpanaba it alert level, kinahangean nga mapadasig ro pagbakuna kontra covid 19 agud nga maabot ro 70% it target population.
Mag-eowas kara, paga-usisa pa it NIATF ro infection rate, mga na-admit sa ospital ag ro pangkabilugan nga sitwasyon it kaso it Covid-19 sa probinsiya.
Sa idaeum it Alert Level 1, mas maabung negosyo ro pwedeng magbukas sa mas mabahoe nga kapasidad.
Apang gin-insister ni miraflores nga kinahangean sa gihapon nga hugut nga ipatuman ro minimum health protocols agud nga malikawan ro uman nga pag-instrikto sa mga restriksyon.
Kadungan kara, gin engganyo it gobernador ro mga local government units nga padasigan pa ro andang vaccination drive agud nga mabakunahan ro andang mga eligible residents.
Plano man nanda nga magbutang it mas maabu nga vaccination sites sa bilog nga probinsiya agud nga maabot ro ginahandum nga herd immunity ukon 427,664 nga eligible population.
Sa makaron hay naga-abot pa eamang sa 145,262 ro fully vaccinated ukon 33.97% samtang 244,736 ukon 57.14% ro naturukan it unang dose.
Nag apela man ro opisyal sa mga nursing students nga mag-volunteer bilang mga vaccinators.
Sa mga owa pa nakapabakuna, magpa-rehistro eon suno kana ukon mag-agto sa mga walk-in vaccination sites.
Ro Aklan hay nakalista it 12,649 nga kaso it covid 19 umpisa nga magtuhaw ro pandemya.
