KALIBO, Aklan—Uman nga ginkilaea ro probinsya it Aklan bilang ‘Most Competitive Province’ sa bilog nga Western Visayas sa 2023 Cities and Municipalities Competitive Index ukon CMCI Awards.
Suno kay Aklan 2nd district board member Jay Tejada, masuwerte ro probinsya bangud nga naging consistent raya sa pagiging number one.
Suno pa kana nga nagatutok ro gobyerno probinsyal sa economic competitiveness ukon business friendly province base sa parameters nga gin-set it mga business sectors kaeakip ro DTI nga sambilog sa mga ahensya nga nagatutok kara.
Dugang pa kara, may limang haligi it competitive index agud masukat ag ma-evaluate ro ikasarang it sangka probinsiya pinaagi sa economic governance sa mga business-friendly policies nga ginapatuman sa probinsya.
Ginpabutyag pa ni Tejada nga ensakto ag husto ro ginahimo it probinsya pag-abot sa economic enterprise ag business climate.
Ro Cities and Municipalities Competitiveness Index ukon CMCI hay sangka dag-unang ranking it mga siyudad ag munisipalidad sa nasyon nga ginhimo it national Competitive Council pinaagi sa Regional Competitiveness Committees, sa bulig man it United States Agency for Internal Development.
