KALIBO, Aklan—Uman nga nakalista it kabilugang 15 ka mga indibidwal nga nagpositibo sa covid-19 sa bilog nga probinsya it Aklan.
Base sa ginpaguwa nga datos it Aklan Provincial Epidemiology Surveillance Unit it Provincial Health Office, raya hay ginakaeakipan it tig-daywa maghalin sa banwa it Banga ag Numancia; tig-sambilog maghalin sa munisipilad it Ibajay, Libacao, Makato ag New Washington; kamana man pito ro nailista sa banwa it Kalibo.
Sa kabilugan, ro Aklan hay may 34 eon man nga aktibong kaso it deadly virus matapos nga gulping sumirit ro numero it mga nagkasakit it covid-19.
Raya hay ginakaeakipan it 22 nga presenteng una sa quarantine facility, napueo ro naka-home quarantine ag daywa ro admitted.
Sa makaron ro probinsya hay may 12,698 nga kaso it makataeapon nga sakit kon siin 97% eon kara ro nakarekober matapos nga nagpaidaeom sa quarantine protocol ag pagbueong.
Samtang, 324 eon ro mga binawian it hueam nga kinabuhi sa bilog nga probinsya sa sueod it haeos daywang dag-on nga pakikipagsukoe sa nasambit nga pandemya.
