KALIBO, Aklan—Uman nga nadugangan ro listahan it Provincial Health Office (PHO) it tinamaan it 2019 coronavirus disease ukon Covid-19 sa probinsya it Aklan.
Raya hay ro sangka 45-anyos nga babaye nga residente it banwa it Numancia.
Nakalebel imaw sa kategorya it local case bangud sa pagka-expose kara sa confirmed case.
Sa pihak kara, nadugangan man ro numero it mga nakarecover sa nasambit nga sakit.
Raya hay ro sangka 24-anyos nga babaye nga locally stranded individual ukon LSI nga residente it banwa it Banga.
Sa makaron, ro probinsya it Aklan hay nakalista eon it 141 nga kabilugang kaso it Covid-19.
Sa nasambit nga numero, 119 ro totally eon nga nagmayad sa nasambit nga sakit matapos ro pagbueong ag pagpaidaeom sa quarantine period ag 7 ro nailistang namatay.
Samtang, 15 pa sa makaron ro aktibong kaso it sakit ag presenteng una sa facility quarantined para sa maid-id nga monitoring.
Ro Aklan hay nagapabilin sa modified general community quarantine kon sa siin padayon nga naga-iral ro curfew ag hugot sa gihapon ro padumdom it health authorities angot sa ginapasunod nga minimum health standards kaparehas ko permi nga paghugas it alima ag ro mandatory nga pagsuksok it face mask kamana man face shield.
