Bangud sa uwa naantisipar nga madayon ro Western Visayas Regional Athletic Association ukon WVRAA Meet 2023 makaron nga dag-on matapos nga napaiway raya it haeos daywang dag-on bangud sa pandemya, sangkiri eamang ro naging delegasyon it probinsya it Guimaras.
Suno kay Mr. Armando Gabion Jr., chief education supervisor for governance and operations divison it division of Guimaras, kabilugan nga 388 ro andang delegasyon nga ginakaeakipan it mga atleta, coaches, trainors ag committees.
Raya eamang sigon ro nasarangan nga maabutan it andang special education fund ag kon madugangan pa ro numero it andang delegasyon hay pagakapuson sanda sa pondo.
Angot kara, inde tanan nga sporting events hay anda nga paga-intrahan.
Sa secondary level suno kana hay 15 nga sporting events eamang ro andang pagpasakupan ag sa elementary hay pito ka mga hampang.
Sa pihak nga parte, ginpasaeamatan man ni Gabion ro manami nga pagtratar kanda it pamunuan ag mga manugturo it Makato Integrated School kon sa siin sanda makaron nagdayon.
Mainit sigon sandang gin-abi-abi sa andang pag-abot ag haeos nagapaeanobra ro mga kwarto nga ginprovide para kanda.
Haom eon man ro mga atleta it Guimaras nga makipagsambuwa sa mga nakataeana nga hampang para kanda.
