KALIBO, Aklan–Ginpasiguro ni Punong barangay Florido Rubrico Jr. it Pagsanghan, Banga nga insigidang masolusyonan ag maayos ro andang problema sa street light sa mas madali nga panyempo.
Ginpromisa man kara nga sambilog raya sa magiging prayoridad sa andang session makaron nga adlaw.
Suno kay Kapitan Rubrico, nauna eon nana nga ginpaayos sa electrician ro linya it mga street light ag nagbakae pa it circuit breaker apang matapos sigon ro masobra daywang oras nga pagpahayag it mga iwag hay uman raya nga nagpisik.
Dikato eon nanda natueopangdan nga maabu nga mga leak ag grounded nga wiring base sa pagsikyar it ginhire nanda nga electrician.
Gin-aku man kara nga may kalumaan eon ro andang wiring.
Hin-aga sigon adlaw it Dominggo hay pagatinguhaan nana nga mapa-check ro tanan nga linya kaeakip ro bombilya it street light agud nga matapos eon ro problema.
Samtang, ginbulgar man ni Kapitan Rubrico nga may nakaabot kana nga impormasyon nga may pilang residente nga nagakonekta sa linya it street light.
Raya sigon hay posibleng sambilog man sa mga rason it madasig nga pagkasamad kara.
