KALIBO, Aklan–Nagbilog it temporaryo nga solusyon ro lokal nga gobyerno ag Municipal Economic Enterprise Development Office (MEEDO)-Kalibo para masabat ro reklamo it pilang ka mga vegetable dealer sa sueod it Kalibo Public Market kontra sa mga ambulant vendors.
Suno kay MEEDO-Kalibo Head Mary Gay Quimpo-Joel, hugut nga ginareklamo it mga nagabaligya it tinuea sa sueod it tindahan ro kawad-an it costumer bangud sa mga nakaplastar nga bolante sa kahabaon it Toting Reyes Street.
Base sigon sa naging resulta it andang pueong kaibahan si Kalibo Mayor Emerson Lachica, ginkasugtanan nga taw-an it sang dominggo ro ambulant vendor nga magbaligya umpisa alas-12:00 hasta alas-4:30 it aga-aga sa guwa it tindahan.
Dapat sigon nga nakahimos eon ro mga raya pag-abot it alas-4:30 para mapasugtan sanda nga magpabilin.
Engkaso sigon nga mapas-eawan ro mga raya nga magsunod sa gintaeana nga polisiya, posible sanda nga i-relocate sa bahin it 19 Martyrs Street.
