KALIBO, Aklan—Padayun pa ro ginahimo nga imbestigasyon it Bureau of Fire Protection ukon BFP-Kalibo agud nga matumod ro posibleng ginhalinan it sunog sa sueod it kwarto it sangka baeay pasado alas-8, gabi-i it domingo, Oktubre 27 sa Sitio Tugbungan, Barangay Caano, Kalibo.
Suno kay FO1 Emmanuel Orale it BFP-Kalibo nga gina-usisa pa nanda kon sa nakasaksak nga extension cord naghalin ro kaeayo nga nagpa-ugdaw sa mga kagamitan.
Sa initial nga assessment base sa panaysayon it tag-ana it baeay nga si Jinky Magno Piojo, ro anang unga ro nakapan-o nga naga-asu ro kaiping nanda nga kwarto nga ginhimo nga stock room .
Samtang, daywang ka tawo ro nailistang naninahan sa insidente nga insigida man nga gindaea sa ospital para sa nagakaigo nga pagbueong.
Sa pihak nga parte, ginpahayag ni Mrs. Piojo nga haeos nagkaeasunog ro mga gamit sa sueod it nasambit nga kwarto nga ginaeakipan it mga eambong nga nakasueod sa aparador, double deck nga katre, foam ag pilang mga importanteng dokumento.
Posible suno kana nga madasig nga nagkalhit ro kaeayo bangud sa mga kagamitan nga madaling masunog.
Mabahoe man ro pagpasaeamat it pamilya bangud sa pagbulig it andang mga kaeapit-baeay ag fire auxiliary group it andang barangay council rason nga insigidang natapna ro kaeayo.
Indi pa matumod ro balor it nasunog nga mga kagamitan.
