KALIBO, Aklan—Nagpatigayon it asembliya ro mga progresibong grupo sa Aklan kadungan sa ika-6 nga dag-on nga pagdumdum sa pagpanaeasa it bagyong Yolanda ko Nobyembre 8, 2013.
Suno kay Kim Sin Tugna, provincial coordinator it Bagong Alyansang Makabayan nga tuyo it andang pagtililipon kaibahan ro Rise-up Aklan nga sukton ro gobyerno sa mga ginpromisa kara nga bulig para sa mga Yolanda survivors nga hasta sa makaron hay owa pa naitau.
Suno kay Tugna nga an-um nga dag-on eon ro nagtaliwan, apang masubo bangud nga maabu pa sa mga biktima ro owa it desenteng baeay.
Mag-eowas kara, maabu pa ro owa nakabaton it emergency shelter assistance, presidential financial assistance ag sustainable livelihood program.
Kaeabanan sigon sa mga nabiktima it Yolanda hay nagapabilin sa mga danger zones bangud nga owa pa kanda na-turn-over ro mga housing units.
Haeos 15,000 pa sigon nga mga akeanon ro owa nakabaton it financial assistance, kun sa siin, ro andang gindihon nga petisyon hay nagapabilin nga naka-pending sa Department of Social Welfare and Development (DWSD) regional office.
