KALIBO, Aklan—Naging madinaeag-on ro ginpatigayon nga project launching and blessing it negosyo ukon sustainable livelihood it 30 benepisyaryo nga ginakabig nga Person Who Used Drugs ukon PWUDs nga nagpaidaeom sa Community Based Rehabilitation Program (CBRP) it lokal nga gobyerno ag pulisya.
Suno kay Municipal Social Welfare Development Office (MSWDO) head Lolly Espino, ro nasambitang livelihood hay nagabalor it P450,000 nga ginpondohan it Department of Social Welfare and Development (DSWD) Region VI.
Ginpahayag dugang nga napasaalima it lokal nga gobyerno ro tseke ko Oktobre 17.
Samtang sa pihak nga parte, gin-engganyo ni Kalibo Mayor Emerson Lachica ro mga benepisyaryo it nasambitang proyekto nga haeongan ag hugdan ro andang negosyo agud nga mag-umwad para sa bwas-damlag it andang bilog nga pamilya.
Ginpahayag dugang nga taeagsa malang nagata-o it mabahoe nga oportunidad ro DSWD rason nga eubus ro anang pagpasaeamat sa ahensya sa pagkataeopangod sa banwa it Kalibo.
