KALIBO, Aklan—Ginatun-an eon it sangguniang bayan it Kalibo ro proposal it mga negosyante it fish and meat section it Kalibo public market angot sa andang posibleng maging relocation site.
Suno kay Rosalinda Tampos, presidente it fish vendor association sa nasambit nga tindahan nga ginahueat eon lang nanda kon hin-uno sanda igapatawag agud nga mabo-oe ro andang opinion sa plano.
Raya hay kasunod it nakataeana nga pag-umpisa it construction it “Bagong Kalibo” public market.
Hasta makaron suno kana hay owa sanda it ideya kon siin sanda igasaylo.
Sa oras nga matapos ro tindahan, makaangkon raya it nagakaigo nga parking area, maeapad nga fish, vegetable and meat sections, kamana man nga may mga restrooms ag drainage system.
Nagpanindugan si Tampos nga owa sanda naila nga iseparar ro relocation site it wet section sa dry section.
Plano sigon it lokal nga gobyerno it Kalibo nga temporaryo sanda nga ibutang maeapit sa terminal area it eastern side nga hugut nanda nga ginapamalibaran bangud nga raya hay maeayo sa iba pang vendors nga planong ibutang sa kahabaon it igasaradong portion it Toting Reyes St. Kalibo.
Nasayuran nga gina-umpisahan eon it LGU-Kalibo ro construction it mga istraktura nga pagabutangan it fish ag meat section sa nasambit nga lugar .
