Uman nga igadihon sa Kamara ni Navotas City Rep. Toby Tiangco ro proposisyon nga boe-on ro systems loss charges sa kada buean nga ginasukot sa kuryente it mga konsyumer.
Raya hay kasunod it panawagan ni Pangueong Ferdinand Marcos Jr., sa anang ika-limang State of the Nation Address ukon SONA 2026 nga indi eon dapat ipasa sa mga konsyumer ro nasambit nga sukot agud nga mapanaba ro mataas nga presyo it kuryente sa nasyon.
Suno kay Tiangco, mabuhay eon nana nga ginasueong ro House Bill No. 942 apang owa raya naga-hueag sa Kongreso.
Dugang pa kara nga naging mabahoe nga kahigayunan ro panawagan it Pangueo agud nga eubusan nga maging laye ro repormang direktang magapanaba sa gaeastuson sa kuryente it kada pamilyang Pilipino.
Sa idaeum it proposisyon, igabawae sa mga pribadong distribution utilities ro pagpasa it systems loss charges sa mga konsyumer, limitahan sa limang porsiyento ro pwedeng mabawi nga lehitimong technical losses it mga rural electric cooperative, ag boe-on ro value-added tax ukon VAT sa systems loss charges.
Nagaeaum si Tiangco nga magiging laye ro proposisyon bangud nga klaru nga raya hay kaparte it legislative agenda it Pangueo ag nagapati imaw nga makatau raya it insigidang kasoehayan sa mga pamilyang Pilipino pinaagi sa mas manabang kada buean nga sukot sa kuryente.
