Nagpromisa si Senate President Win Gatchalian nga paga-unahon it Senado ro proposed bill nga magabawae sa paggamit it social media it mga menor de edad sa pagbalik it sesyon it Kongreso.
Suno kay Gatchalian, naga-inabu eon ro mga nasyon nga nagapatuman it makarondaya nga polisiya agud nga maprotektahan ro mga unga kontra sa peligroso nga content sa internet.
Sa France, ginpasa ro laye nga magabawae sa mga unga nga owa pa it 15 anyos nga makaangkon it social media accounts umpisa sa Setyembre 1, 2026. Pagataw-an ro mga platform it ap-at nga buean agud nga isarado ro mga account it mga menor de edad ag magpatuman it age verification.
Sa Australia, ginbawae eon man umpisa sa Disyembre 10, 2025 ro social media accounts para sa mga owa pa it 16 anyos samtang gin-umpisahan eon man it Malaysia ro pagbawae sa mga unga nga owa pa it 16 nga magbukas it social media accounts.
Suno kay Gatchalian, ginapakita it nasambit nga mga tikang ro nagabahoe nga pagkilaea sa peligro it social media sa ikamayad nga eawas, kaeowasan, ag kamaeayran it mga inunga.
