Business News ——Eusot eon sa final reading it House of Representatives ro House Bill 8136, nga magabilog sa coco levy trust fund pinaagi sa botong 221-6-0.
Ginpahayag ni House Speaker Lord Allan Velasco nga tuyo it proposisyon nga mataw-an ro mga pigadong coconut farmers it benepisyo halin sa buwis nga nakolekta halin kanda may pilang dekada eon ro nagtaliwan nga makaron hay ginatantiya nga kapin sa P76-billion pesos ro balor .
Gindeklara sa proposisyon ro coconut levy assets bilang trust fund, ag nagatau man raya it mga sueundanan para sa management ag utilization it pondo.
Gina-otorisa man it proposisyon ro Privatization and Management Office nga i-dispose ro coconut levy assets para sa benepisyo it mga mangunguma it niyog ag sa development it coconut industry.
Para kay Velasco, makabig nga makasaysayan para sa masobra sa 3-milyong coconut farmers ro pag-apruba sa proposisyon.
Ginpamilit it mamalidha nga mabuhay eon nga owa napaburan ro mga mangunguma it niyog maskin nga sanda gid man ro dapat nga makapanipueos sa nasambit nga pondo.
Ginatantiya nga kapin sa 3.5-million nga coconut farmers halin sa 68 coconut-producing provinces nga nagapanag-iya it indi magsobra sa limang ektarya it farmland ro ginaeauman nga makapanipueos sa nasambit nga proposisyon.
