KALIBO, Aklan — Pabor ro pilang mga residente it Isla it Boracay sa proposisyon nga gindihon ni Cong. Leila De Lima para sa congressional inquiry angot sa planong Boracay bridge project nga nagabalor it P7.78 bilyon matapos i-award it Department of Public Works and Highways ro kontrata sa subsidiary it San Miguel Holdings Corp. sa pihak it hugut nga pagpamalibad it mga lokal nga komunidad.
Suno kay dating Malay Councilor Nenette Aguirre Graf nga welcome development ro nasambit nga resolution ni De Lima .
Sa House Resolution No. 1021, ginahinyu ni De Lima sa House Committee on Public Works and Highways nga magpatigayon it maid-id nga imbestigasyon in aid of legislation agud nga matumod kun nasunod it DPWH ro tamang proseso para sa planong 2.54-kilometrong tulay.
Nagguwa ro panawagan matapos kuwestiyunon it pilang lokal nga opisyal kun paalin nga naitau it DPWH ro public-private partnership contract sa San Miguel Holdings Corp. ko Marso 30.
Tuyo man it proposisyon nga sayuron kon nasunod ro mga probisyon it Local Government Code, kaibahan ro pagpatigayon it komprehensibong environmental impact assessment ag bastante nga konsultasyon sa mga apektadong komunidad, katutubo, ag iba pang stakeholders.
Madumduman nga mabuhay eon nga ginpamalibaran it pilang sektor umpisa pa ko 2019 ro planong tulay nga magasugpon sa Boracay ag mainland Malay.
Kaibahan sa mga nagpahayag it pagkontra ro provincial government it Aklan, lokal nga gobyerno it Malay, Philippine Chamber of Commerce-Boracay, ag pilang katutubong grupo bangud sa posibleng epekto kara sa environment, pangabuhian it mga bangkero, ag displacement it mga residente kaibahan ro mga Ati.
Suno kay De Lima, importanteng masiguro nga ginasunod ro ginapatuman nga laye it mga mabahoe nga infrastructure project samtang ginaprotektahan ro kalikasan, pangabuhian it mga residente, ag kinamatarung it mga lokal nga gobyerno ag katutubo.
