Kalibo Aklan ———“Dapat nga i-postpone eang ag indi eubusan nga i-abolish”.
Raya ro naging sabat ni Aklan 1st District Sangguniang Panlalawigan Member Atty. Harry Sucgang sa proposisyon ni Department of Labor and Employment (DOLE) Secretary Silvestre Bello nga boe-on eon ro licensure examinations partikular sa law ag nursing professions.
Suno kay Atty. Sucgang nga pwede eamang nga ikonsidera ro pagpaiway sa board exam bangud sa naexperiensiyahan nga COVID-19 pandemic.
Apang owa nagakabagay nga duea-on gid raya bangud nga unfair ukon bukon it patas sa mga nagtinguha agud nga makapasar sa mga makarondaya nga eksaminasyon.
Partikular nga gintumod kara ro bar exam para sa mga gustong maging abogado nga mag-eowas sigon nga malisod ag ginapatigayon sa tanan nga dominggo kada buean it Nobyembre hay bukon raya it sakop it Professional Regulation Commission kundi sa hurisdiksyon it korte suprema.
Nauna eon nga ginrason ni Bello nga ro nursing course hay sobrang mahae ag dugang nga kabudlay ro pagbo-oe it board exams.
Ro mga estudyanteng nagabo-oe sigon it nursing profession hay maabu eon nga ginabo-oe nga tests ag exams.
Pabor man si Atty. Sucgang kara bangud nga mas maabu sigon nga matun-an ro mga nursing students sa field eabi eon sa andang on-the-job-training.
Gindugang pa it Sekretaryo nga ro estudyante nga nakatapos sa eskwelahan nga accredited it Commission on Higher Education (CHED) hay indi eon kinahangena ro licensure exams.
Nasayuran nga mag-eowas sa law ag nursing professions, gusto man ni Bello nga bungkagon ro licensure exams para sa engineers ag dentists.
