Magapangatubang sa mabug-at nga penalidad ro mga ginikanan ukon non custodial parent nga indi magtao it suporta para sa andang onga.
Ginproponer ni Senior Deputy Minority Leader ag Northern Samar Representative Paul Daza ro House Bill No. 44 or “An Act Ensuring Child Support and Penalizing Parental Refusal or Neglect Thereof.”
Nakapasueod sa nasambit nga measure ro ‘harsh provision’ ukon magapangatubang sa criminal liability ro mga ginikanan nga magabalibad nga magtao it suporta ukon sustento sa andang onga sa tyempo nga maging eubusan nga laye ro nasambit nga hagna.
Sa ginpatigayon nga pagpamati it House Committee on Welfare of Children sa pagpanguna ni Rep. Angelica Natasha Co, ginpahayag ni Daza nga sa anang version hay ginbutangan eon it mabug-at nga provision kapareho it pagkakulong.
Punto it beteranong mamalidha nga ro nasambit nga sanctions hay para makaangkon it ngipon sa mandato it child welfare and protection eabi eon sa mga non custodial parent para ma-oblig sanda nga magtao it child support.
Pabor man si Department of Social Welfare and Development (DSWD) Assistant Bureau Director Miramel Garcia-Laxa, sa naging sentimiyento ni Daza.
Sandig sa datos it DSWD kapin sa 280 child custody cases ro ginadueog kanda ko nagtaliwan nga dag-on.
Ro PNP man hay nakapaglista it 3,684 cases of economic violence umpisa ko 2018 hasta 2023 kaibahan kara ro child support negligence sa idaeom it Republic Act (RA) No. 9262.
Ginaproponer ni Cong. Daza ro P6,000.00 montly child support.
Sa tyempo nga ro non-custodial parent hay indi makatao it sustento matapos ro daywang buean magapangatubang raya sa nagakaigong disposisyon ag posibleng makulong it ap-at nga dag-on ag may penalidad nga nagabalor it kapin sa P300,000.00
