KALIBO, Aklan—Aprubado eon it Sangguniang Bayan it Kalibo ro Ordinance No. 2020-008 ukon ro mandatory nga pagsuksok it face mask ag face shield it tanan nga indibidwal nga naga-adto sa mga pampublikong lugar sa Barangay Poblacion, Kalibo.
Suno kay Kagawad Mark Sy, temporaryo anay nanda nga igapaiway ro implementasyon it ordinansa agud nga mataw-an it daean ro pagpanupod it face shield sa pilang negosyante ag residential area sa Brgy. Poblacion kung siin kaibahan eon kara ro Oyo Torong St., C. Laserna, Rizal ag C. Quimpo St.
Kapin sa 2,000 nga donasyon sigon it face shield ro nag-abot sa andang opisina maghalin sa sangka negosyante.
Target sigon nanda nga mataw-an ro mga indibidwal nga owa it kapasidad nga magbakae it proteksyon kontra sa deadly virus nga daea it Coronavirus Disease 2019 ukon COVID-19 eabi pa ag nakalista eon it pinakaunang local transmission ro probinsya it Aklan.
Kun matapos eon sigon sanda sa pagpanupod hay insigida imaw nga magakonsulta kay Punong Barangay Niel Candelario agud nga maistoryahan ro impelementasyon it nasambit nga ordinansa.
