KALIBO, Aklan—Pormal eon nga ginbuksan it Department of Education ukon DepEd-Aklan ro kauna-unahan nga Provincial Athletic Association Meet sa probinsiya matapos ro haeos tatlong dag-on nga pagpundo it mga aktibidad kapareho it mga sports activities bangud sa pandemya.
Mismong si Aklan governor Joen Miraflores ag DepEd-Aklan Schools Division Superintendent Dr. Feliciano Buenafe ro nagpanguna sa seremonya sa uman nga pagpatigayon it provincial meet makaron nga adlaw it Miyerkules, Marso 22 nga ginhiwat sa Calangcang sports complex sa banwa it Makato.
Gin-umpisahan ro seremonya pinaagi sa Banner Raising ag nakaangkon man it presentation ro kada competing units halin unit 1 hasta 6.
Nagtau man it mensahe si Aklan State University president Dr. Emily Arangote ag Makato mayor Ramon Anselmo Martin Legaspi.
Sa pihak nga parte, hugut nga seguridad ro ginpatuman sa nasambit nga event.
Suno kay P/Capt. Merrifin Carisosa, hepe it Makato Municipal Police Station nga gina-usisa anay ro tanan nga mga bag it nagasueod ag nagaguwa sa entrance ag exit it venue agud nga matumod ro mga indibidwal nga nagadaea it mga ginabawae nga bagay eabi eon ro mga baril ag mataeum nga hinganiban.
Bawae man ro pag-park it mga saeakyan sa bisinidad it sueod ag guwa it sports complex kamana man nga may gindeploy nga mga MAP members ag barangay tanod agud nga magbantay sa daeagan it trapiko.
Dugang pa nga may ginataeana man nga designated area para sa mga vendors.
Ginpasiguro man ni Capt. Carisosa nga may nakapahaum sanda nga security measures para maprotektahan ro mga atleta ag iba pang kaparte ag nagasaksi sa sporting event.
