Ginpabugae it mga miyembro it provincial board members ro andang hinimuan sa pagtapos it 18th sangguniang panlalawigan.
Suno kay Merlyn Montaño, Sangguniang Panlalawigan Secretary nga ginakilaea ag ginapasaeamatan nanda ro mga miyembro it 18th SP sa pagpanguna ni Vice Governor Reynaldo “Boy” Quimpo nga uman nga nailihir sa pwesto kaibahan ro 11 nga board members.
Sa nasambit nga numero suno kana hay tatlo eon lang ro nabilin ag ro iba hay puro nagtapos eon ro termino.
Sa sueod it tatlong dag-on, nakapatigayon sigon ro mga raya it 151 nga regular session ag 7 nga special session.
Nakalista it 882 nga committee hearings.
Sa kabilugan nga enactments, nakahimo it 19 nga general ordinances, 32 nga appropriations ordinances , 19 nga special ordinances ag lima nga tax ordinance.
Mag-eowas kara, naka-review man sanda it 1,127 nga municipal legislative enactments halin sa 17 nga banwa ag nakatalakay it 1,897 nga resolutions.
Gintumod ni Montaño nga pila sa mga importanteng ordinansa nga ginpasa it SP hay ro pagtau it importansiya sa sektor agrikultura, mga tikang agud nga masuk-ean ro COVID 19 pandemic kun sa siin maabu nga mga pondo ro gin-realign, African swine fever prevention ag pagtaeana it pondo agud nga makaangkon it bastante nga supply it bugas nga pwedeng magamit sa tiempo it kalamidad ag emerhensiya , pag-amyenda sa revenue code ag iba pa.
Ginapabugae man nanda ro agri-aqua farm sa barangay nalook kalibo nga eubusan nga natapos sa idaeum it 18th SP.
Sa pihak nga parte, ro top 3 performer sa 18th SP hay sanday si board member ramon gelito nga nakahimo it 178 nga resolution ag ordinansa nga ginsundan ni hon. soviet dela cruz nga may 159 ag hon. jose Miguel Miraflores nga may 153 nga puro kaibahan sa committee on agriculture ag appropriations.
Owa man sigon it paea-absent nga board member kada regular session apang nakadepende ro attendance sa komite nga ginabuytan.
Sa pangkabilugan suno kana hay naging manami ro gin-aywan it 18th SP ag nagaeaum nga mapadayun it 19th SP.
