KALIBO, Aklan — Ginmandu eon ni Governor Florencio Miraflores ro pagbilog it Investigation Team para imbestigahan ro security lapses it Aklan Rehabilitation Center matapos nga matakasan it daywang mga inmates.
Suno kay Aklan 1st District Board Member Nemesio Neron, nakabaehag sa Executive Order No. 050 nga ginpaguwa it gobernador ro pagbilog it investigating committee nga pagapangunahan ni Atty. Shelwyn Ibarreta kaeakip ro mga miyembro nga sanday Provincial General Services Officer Medelia Solanoy, Provincial Human Resource Management Officer Methuselah Sta. Maria, acting Provincial Legal Officer Atty. Lorielle Rovero ag kaibahan man imaw mismo bilang chairman it committee on peace and order.
Katuyuan sigon kara nga masayuran ro kamatuoran sa likod it pagka-eskapo it daywang ka mga preso samtang una sa kostudiya it mga jail guards.
Suno pa kay Board Member Neron, igapatigayon ro unang committee hearing sa adlaw it Lunes, Oktobre 21.
Madumduman nga unang naka-eskapo si JR Isuga Ruiz, residente it banwang Libacao nga may kasong rape kon sa siin sa banwa it Malinao eon imaw nadakpan makataliwan ro sang domingo.
Samtang, padayon pa sa makaron nga ginatugis si Jose Tropa ag residente it Brgy. Tamokoe, Tangalan nga naka-eskapo sa anang bantay nga si Jail guard Igmedio Torda sa Batangas Port samtang nagapauli halin sa court hearing sa kasong murder sa Manila.
