Kalibo Aklan ——-Bangud sa pagtaas it mga nailistang kumpirmadong kaso it Coronavirus Disease 2019 ukon COVID-19 sa bilog nga probinsya it Aklan, nagpatawag it emergency meeting kahapon ro Provincial Inter-Agency Task Force sa tanan nga mga alkalde it probinsya.
Raya hay para andang maistoryahan ro mga bulig nga posibleng maitao it Provincial government eabi eon sa banwa it Kalibo bangud pilang porsyon it mga kabarangayan kara ro ginpaidaeom sa granular ag surgical lockdown.
Suno kay League of the Municipalities of the Philippines (LMP) Aklan Chapter President ag Ibajay Mayor Joen Miraflores, naging sentro it andang pueong ro mga ayuda nga igatao it provincial government sa lokal nga gobyerno it Kalibo partikular ro relief goods.
Raya hay para masiguro nga makaangkon it bastante nga supply it pagkaon nga igapanupod sa mga household nga apaketado it granular ag surgical lockdown.
Sa pihak nga parte, ginatun-an man sigon nanda nga ipaidaeom sa 14 days mandatory quarantine ro mga indibidwal nga maghalin sa banwa it Kalibo ag maga-uli sa andang mga banwa.
Raya nga tikang hay bilang precautionary measure agud nga masiguro nga bukon it carrier it virus ro mga natungdan nga indibiwal maskin maghalin sanda sa lugar nga nakalista it maabo nga kaso it local transmission it sakit.
Apang, ginklaro man kara nga owa pa it Executive Order angot kara ag depende sigon raya sa munisipyo kun magapatuman sanda it makarondaya nga sueondanan.
