Kalibo Aklan ——-Nagpatigayon it emergency meeting ro Provincial Inter-agency Task Force kasunod it nagatinaas nga kaso it coronavirus disease 2019 (COVID-19) sa Aklan.
Gintalakay sa pueong ro mga estratehiyang posibleng gamiton it probinsiya engkaso nga makaangkon it mga emergency matapos nga maeakip eon ro Aklan sa high risk category kasunod it pagtinaas it kaso it deadly virus.
Ginatun-an man it IATF kon makaangkon it extension ro pinaka-ulihing ginpaguwa nga Executive Order ni Governor Florencio Miraflores.
Madumduman nga hasta eamang sa Hunyo 30 magiging epektibo ro nasambit nga EO nga nagatuyo nga matapna ro pagsirit it COVID cases .
Ginhinyu man it Gobernador sa mga Municipal Mayors nga dugangan ro andang mga isolation facilities ag i-realign ro posibleng maboe-an it pondo para sa COVID-19 response.
Sa makaron hay na-classify ro mga banwa it Lezo ag Makato bilang critical samtang high risk ro mga banwa it Ibajay, Nabas, Numancia ag Tangalan.
Moderate risk ro banwa it Altavas, Batan, Buruanga, Kalibo, Malay, Malinao ag New Washington samtang nabutang eon sa low risk classifications ro mga banwa it Balete, Banga, Libacao ag Madalag.
Base sa pinaka-ulihing datus it Provincial Epidemiology and Surveillance Unit it Aklan Provincial Health Office, ro Aklan hay may kabilugan nga 3,406 nga kaso umpisa nga magtuhaw ro pandemya.
Raya hay matapos nga makalista it 95 nga bag-ong kaso kahapon Hunyo 18.
Sa nasambit nga numero, 888 ro bag-ong kaso ag 2,442 ro nagmayad.
Nagapabilin sa 76 ro namatay bangud sa COVID infection .
Ro banwa nga may pinakamaabu nga bag-ong kaso hay ro Kalibo nga nakalista it 34; ginsundan it Malay nga may 23; Ibajay nga may 12; banga nga waeo; makato nga may 6; New Washington nga ap-at; numancia nga may tatlo, ag tig sambilog sa banwa it Tangalan ag Lezo.
