Kalibo Aklan ———Nagpatigayon it hinun-anon ro Provincial Inter-agency Task Force sa probinsya it Aklan kaibahan ro tanan nga mga Mayor sa nagkaeain eain nga banwa agud nga talakayon ro may kaangtanan sa mga pagahimuon nga tikang it probinsya engkasong magpadayun ro pagtinaas it mga nailistang kaso it coronavirus disease ukon COVID-19.
Suno kay provincial administrator Atty. Selwyn Ibarreta nga makarun nagapahaom eun sanda matapos nga ginpaidaeum sa Alert Level 3 ro Metro Manila ag andang ginapreparahan ro mga tikang nga pagahimuon kung magkalhit pa ro panibag-ong omicron variant sa mga probinsya.
Una kara ginapasiguro sigon it provincial IATF sa tanan nga mga Mayors nga magapabilin nga aktibo ro tanan nga mga quarantine facility sa kada Barangay.
Samtang nagapadayun man ro pag-engganyo sa tanan nga mga pomoeuyong Akeanon nga magpabakuna kontra coronavirus disease ukon COVID-19 agud makaangkon it dugang nga proteksiyon kontra sa makamaeatay nga sakit.
Samtang, gintalakay man sa nasambitan nga hinun-anon ro hingyo it LGU-Kalibo sa provincial IATF nga magpatigayon it pilang ka mga aktibidadis sa nagahilapit sa Kalibo Ati-atihan festival.
Nasayuran nga ro regional IATF ro magadesisyon kung puweding magpatigayon it nasambitan nga nga aktibidad sandig man sa gihapon sa rekomendasyon it provincial IATF.
