KALIBO, Aklan — Pormal eon nga nagdihon it andang natungdan nga certificates of candidacy (COC), agahon it Lunes, Oktubre 7 ro provincial leaders it lokal nga partidong Tibyog Akean .
Pagkatapos it misa sa St. John The Baptist cathedral, nag-agto sa gintaeana nga venue it Commission on Elections (Comelec-Aklan) sa Audio-Visual room it Aklan State University (ASU)-Kalibo campus ro grupo nanday Aklan Governor Jose Enrique “Joen” Miraflores kaibahan ro andang mga pamilya ag tagasuporta para sa ginahueat-hueat nga filing it COC.
Si Aklan Governor Joen Miraflores hay magapa-ilihir para sa ikaywang termino bilang provincial chief executive.
Magiging ka-tandem nana si Balete Mayor Dexter Calizo nga nag-file man it COC bilang bise gobernador.
Nasayuran nga ulihing termino eon makaron si Atty. Reynaldo “Boy” Quimpo bilang vice governor rason nga nagdihon it COC bilang provincial board member sa unang distrito.
Kaibahan it gobernador nga nag-agto sa provincial comelec ro anang amang si dating Aklan Governor Florencio Miraflores ag ina nga si dating Ibajay Mayor Lulu Miraflores ag igmanghud nga si Ibajay Mayor Jose Miguel Miraflores.
Nakita man ro presensiya ni Kalibo mayor Juris Sucro sa ginpatigayon nga misa kahapon nga pormal eon nga nag-file it anang COC makaron nga adlaw it Martes .
Sa pihak nga parte, nagsumite man it anang COC ro unga ni third termer 1st district Congressman Carlito Marquez nga si Jess Marquez nga magahana nga magabueos sa anang pwesto.
Kaibahan nana nga nag-file it COC ro anang ama.
Nagdihon man it andang kandidatura ro mga naka line up nanda nga provincial board members para sa una ag ikaywang distrito.
Sa pihak nga parte, ginpromisa ni incumbent Governor Joen Miraflores nga pagapadayunon ro development ag progreso it Aklan.
Madumduman nga makaron nga adlaw ro last day it filing it COCs.
Samtang, nagdihon man it andang natungdan nga COCs ro mga nagapa-ilihir nga alkalde it kada banwa sa idaeum it Tibyog-Akean kaibahan ro andang mga Sangguniang Bayan members.
