KALIBO, Aklan—Ginaeauman eon it Provincial Tourism Office ro pagnaba it tourist arrival sa probinsya it Aklan partikular sa isla it Boracay bangud sa epekto it coronavirus disease ukon COVID-19.
Suno kay Tourism Officer Roselle Ruiz sa committee hearing it Committee on Health and Social Services it Sangguniang Panlalawigan it Aklan nga base sa andang record, nakalista sanda it 167,017 tourist arrival sa buean it Enero.
Sa nasambitang numero 98,301 kara ro foreign nationals kon sa siin 40, 155 ro halin sa mainland China ag 580 ro halin sa Hong Kong kamana man ro iba hay halin sa Asian countries.
Mabahoe suno kana ro impact sa turismo it COVID-19 kon sa siin ginpakamayad eon lang it mga Chinese business owners nga isarado ro andang mga establisyimento bangud nga kueang pa ro andang kita sa andang ginagastos.
Aminado man ro opisyal nga bukon eamang it isla it Boracay ro apektado kundi ro iba pang local tourist destination sa Aklan.
Nasayuran nga ko 2019 hay gindomina it mga Chinese nationals ro tourist arrival sa isla nga umabot sa 434,175 ag ginsundan it mga Koreans nga may kabilugang numero nga 430,810.
Samtang, nakikipag-angot eon sigon sanda sa Department of Tourism agud nga makipagbahin sa intra-regional tourism agud nga makaengganyo it mga domestic tourist.
Sambilog suno kana raya sa mga pamaagi agud nga inde daeayon nga mawad-an it turista ro Aklan nga igakalugi man it probinsya.
Mag-eowas kara, anda man nga gina-engganyo ro mga establisyimento nga magta-o it discount sa anda nga mga customers.
