KALIBO, Aklan–Naglunsar it nagkaeain-eain nga aktibidad ag programa ro Philippine Statistics Authority (PSA)-Aklan kadungan it selebrasyon it Civil Registration Month makaron nga buean it Pebrero.
Suno kay Glenda Sampaton, Registration Officer II it PSA-Aklan nga ko Pebrero 1 hay nagpatigayun sanda it motorcade sa banwa it Kalibo para ipaabot sa mga pumueoyo nga ro taetaapan hay nagaselebrar it Civil Registration Month.
Mag-euwas kara, nagpatigayun man sanda it information dissemination, mobile registration sa mga selected schools it Junior ag Senior High School kaibahan ro Philsys team.
Samtang, ko Pebrero 23 hay nagpatigayun sanda it Philippine Statistics Quiz sa mga Municipal Civil Registrar personnel kung siin ro nagpanguna hay ro LGU-Malay, pangaywa ro LGU-Tangalan ag pangatlo ro LGU-Nabas.
Ro mga raya sigon ro magiging representante it probinsya sa Regional Elimination sa Iloilo.
May kaangtanan kara, gin-engganyo man ni Sampaton ro publiko nga magparehistro sa andang nagapadayun nga Philsys Barangay Assistance Registration Program.
Tuyo kara nga tanan nga mga pumueoyo sa nasyon hay mairehistro kung siin libreng ginatao ro negative certification kamana man nga mas ginhaeugaan ro mga requirements.
Ro Aklan hay gintaw-an it kapin sa 4,366 nga slot.
Importante sigon nga magparehistro ro tanan agud nga indi makaangkon it problema sa mga dokumento engkaso nga kinahang-eanon raya sa paeaabuton.
